Дзятлаўская зямля дала свету
таленавітых спартыўных людзей. Сярод іх - майстар спорту міжнароднага класа
Рэспублікі Беларусь Галіна Паўлаўна Карнацэвіч
(дзявочае прозвішча - Барук).
Галіна Барук нарадзілася ў
лістападзе 1969 года ў вёсцы Буйкі, якая на той час размяшчалася на тэрыторыі
калгаса "Новае жыццё". На вучобу ў Яварскую школу хадзіла за тры
кіламетры. Як успамінае класны кіраўнік Галіны Ірына Гульнік: "Галя
заўсёды вельмі адказна ставілася да вучобы. У выпускным класе яна была
выдатніцай. Усе грамадскія даручэнні выконвала старанна. З'яўлялася старшынёй
савета дружыны піянерскай арганізацыі, а затым - сакратаром камсамольскай
арганізацыі. Па характары спакойная, добрая і спагадлівая дзяўчына".
У пачатку 80-х гадоў на працу
настаўнікам фізкультуры ў Яварскую школу быў накіраваны Дзмітрый Кароль (цяпер
ён працуе ў гімназіі №1 г.Дзятлава). Дзмітрый Фёдаравіч неадкладна арганізаваў
у школе працу секцыі лёгкай атлетыкі, якую апекавала Сельскае спартыўнае
таварыства "Ураджай".
- Галя Барук дысцыплінавана і
сумленна ставілася да выканання заданняў у секцыі, - распавёў Дзмітрый Кароль.
Пры пастаянных трэніровачных нагрузках яна была адной з лепшых. Удзельнічала ў
раённых спаборніцтвах па атлетыцы. Асабліва ёй атрымоўваліся забегі на доўгія
дыстанцыі. У школе яна была, вядома, спартовым лідарам.
Пасля заканчэння сярэдняй школы
Галя Барук у 1988 годзе паступіла на вучобу ў Гродзенскі ўніверсітэт імя Янкі
Купалы, які скончыла ў 1993 годзе па спецыяльнасці "Гісторыя, выкладчык
сацыяльна-педагагічных навук".
На працягу вучобы ў універсітэце
Галя працягнула займацца спортам. У 1993 годзе, акрамя універсітэцкага дыплома,
яна і здабыла сярэбраны медаль чэмпіянату Беларусі ў бегу на 3000 метраў,
выканала нарматыў майстра спорту. Пасля гэтага поспеху Галіну Барук уключылі ў
склад зборнай Беларусі па лёгкай атлетыцы. Яна выступала на чэмпіянаце свету
1994 года.
Пачаўшы з дыстанцыі 800 метраў,
яна неўзабаве пашырыла свой дыяпазон дысцыплін: 1500, 5000, 10000 метраў. А з
1995 года Галіна Барук выйшла, а дакладней - выбегла, на міжнародныя марафонскія
дыстанцыі.
Застаючыся дзеючай
спартсменкай, яна да 1998 года з'яўлялася і спартсменам-інструктарам
нацыянальнай каманды па лёгкай атлетыцы. У 1999 годзе стала
інструктарам-метадыстам дзяржаўнай установы "Гродзенская абласная школа
вышэйшага спартыўнага майстэрства". Зараз гэта Гродзенскі абласны
комплексны цэнтр алімпійскага рэзерву. З кастрычніка 2014 года спалучае працу
трэнера-выкладчыка і інспектара-метадыста цэнтра.
Галіна Карнацэвіч з'яўляецца
пераможцам і прызёрам шэрагу марафонаў: Вроцлаў, Леборк (Польшча), Сан-Дыега
(ЗША), Будапешт (Венгрыя), Рэймс (Францыя, 3-е месца). Яна была ў васьмёрцы
лепшых у марафонскіх забегах у Венецыі (Італія), Франкфурце, Гамбургу
(Германія), Ля-Рашэль (Францыя), Мумбаі (Індыя), Лас-Вегасе (ЗША), Празе
(Чэхія). Бегала марафон у Чыба-Экідэна(
Японія), у Пекіне (Кітай). Яна пастаянная ўдзельніца марафонскага бегу Дружбы
"Друскінінкай-Гродна", забегаў свету.
На чэмпіянаце свету ў Хельсінкі
(Фінляндыя) у 2003 годзе яна ўстанавіла асабісты рэкорд, удзельнічала ў марафоне
на чэмпіянаце Еўропы. Усяго яна прабегла звыш 60 марафонаў, заключны - у
2015 годзе.
Некаторыя свае ўзнагароды,
асабістыя медалі Галіна Карнацэвіч падарыла землякам, яны захоўваюцца ў
Дзятлаўскім гісторыка-краязнаўчым музеі.
Сёння Галіна Паўлаўна Карнацэвіч - паспяховы
трэнер-выкладчык.
- Я трэнірую чатырох дзяўчат.
Гэта Юлія Кароль, Вікторыя Кушнір, Вольга Краўцова, Ірына Смолава. Яны
перспектыўныя спартсменкі. У 2017 годзе выканалі пастаўленую задачу -
ўдзельнічалі ў чэмпіянаце Еўропы.
Дарэчы, Вікторыя Кушнір - ужо
майстар спорту міжнароднага класа, сярэбраны прызёр чэмпіянату свету 2017 года
ў эстафеце, сярэбраны прызёр чэмпіянату Рэспублікі Беларусь 2017 года на
дыстанцыі 800 метраў.
Галіна Карнацэвіч, як і ў свае
школьныя гады, актыўная ў грамадскім жыцці. У цэнтры алімпійскага рэзерву
з'яўляецца старшынёй прафсаюзнай арганізацыі. Разам з мужам, які працуе ў гэтым
жа цэнтры, выхоўвае сына.
Матэрыялы часткова ўзяты з даследчай работы "Мае землякі - мой гонар" педагогаў і навучэнцаў Вензавецкага дзіцячага сада - сярэдняй школы
Матэрыялы часткова ўзяты з даследчай работы "Мае землякі - мой гонар" педагогаў і навучэнцаў Вензавецкага дзіцячага сада - сярэдняй школы
Комментариев нет:
Отправить комментарий